ས་གནས་འོས་བསྡུ་ཚོགས་ཆུང་།

ས་གནས་འོས་བསྡུ་ལས་ཁང་གི་ཚོགས་མི།

ཚོགས་མི་ཡོང་ཁུངས།

ས་གནས་འོས་བསྡུ་ལས་ཁང་གི་འགན་འཛིན་གཅིག་དང༌། འགན་འཛིན་ལས་རོགས།

ས་གནས་དེར་གཏན་སྡོད་ཆོལ་ཁ་རེ་ནས་མི་འཐུས་རེ་དང༌། ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ནས་མི་འཐུས་རེ།

ཡུ་རོབ་དང་ཨ་ཕི་རི་ཀའི་ཁུལ་དང༌། བྱང་ཨ་རི་དང་ལྷོ་ཨ་རི། རྒྱ་བལ་འབྲུག་གསུམ་ཕུད་པའི་ཨེ་ཤི་ཡ་དང་ཨོ་སེ་ཀྲེ་ལེ་ཤི་ཡ་བཅས་ཀྱི་ས་གནས་འོས་བསྡུ་ལས་ཁང་སོ་སོར་འོས་བསྡུ་བྱས་པའི་ཆོལ་ཁ་ཆོས་བརྒྱུད་དབྱེར་མེད་ཀྱི་ཚོགས་མི་ཉུང་མཐར་ལྔ་རེ་བཅས།

ས་གནས་འོས་བསྡུ་འགན་འཛིན་ཁྱབ་ཁོངས་སུ་འོས་བསྡུ་བྱ་ཡུལ་སྡེ་ཚན་གྱི་གྲངས་འབོར་ལ་གཞིགས་ཏེ། ས་གནས་དེར་དངོས་ཡོད་ཆོལ་ཁ་དང་ཆོས་བརྒྱུད་སོ་སོ་ནས་མི་འཐུས་གཅིག་ནས་གཉིས་བར་སྤར་འཐུས། ས་གནས་དེར་གཏན་སྡོད་བྱེད་མཁན་ཆོལ་ཁ་དང་ཆོས་བརྒྱུད་འོས་འཕེན་པ་མེད་རིགས་ལ་ཐོབ་ཁུངས་ཚང་དགོས་པའི་ངེས་པ་མེད།

མི་འཐུས་ཀྱི་གྲངས་ཚད་གཏན་འབེབས་གཞིར་བཟུང༌། ཐོབ་ཁུངས་སོ་སོའི་མི་མང་ནས་འོས་འདེམས་ཟིན་འཕྲལ་དབུས་འོས་བསྡུ་ལས་ཁང་ལ་འོས་ཐོབ་མི་འཐུས་སོ་སོའི་ལོ་རྒྱུས་མདོར་བསྡུས་སྙན་སེང་ཆོག་མཆན་ཐོབ་མཚམས་ལས་འཁུར་དུ་ཞུགས་དགོས།

ས་གནས་དེར་གཏན་སྡོད་ཆོལ་ཁ་དང་ཆོས་བརྒྱུད་སོ་སོ་ནས་ཟུར་དཔང་རེ་དང་། ཡུ་རོབ་དང་ཨ་ཕི་རི་ཀའི་ཁུལ། བྱང་ཨ་རི་དང་ལྷོ་ཨ་རི། རྒྱ་བལ་འབྲུག་གསུམ་ཕུད་པའི་ཨེ་ཤི་ཡ་དང་ཨོ་སེ་ཀྲེ་ལེ་ཤི་ཡའི་ས་གནས་རེར་ཉུང་མཐར་ཟུར་དཔང་གསུམ་རེ་བཅས་ཐོབ་ཁུངས་སོ་སོའི་མི་མང་ནས་འོས་འདེམས་ཟིན་འཕྲལ་འོས་ཐོབ་ཟུར་དཔང་རྣམས་ཀྱི་མིང་དང་ལོ་རྒྱུས་མདོར་བསྡུས་རེ་དབུས་འོས་བསྡུ་ལས་ཁང་ལ་འབུལ་དགོས།

ས་གནས་འོས་བསྡུ་ལས་ཁང་གི་ཚོགས་མིའི་འོས་ཆོས།

ས་གནས་འོས་བསྡུ་ལས་ཁང་གི་ཚོགས་མི་དང་ཁོངས་གཏོགས་ལས་བྱ་བོད་མི་མང་སྤྱི་འཐུས་འོས་གཞིར་དང་བླངས་འཛུལ་ཞུགས་བྱ་འཆར་ཡོད་པ་རྣམས་དང༌། སྲིད་སྐྱོང་དང་སྤྱི་འཐུས་ཀྱི་འོས་གཞིར་ཞུགས་འཐུས་གསལ་བསྒྲགས་ཟིན་པའི་བོད་མིའི་སྒྲིག་འཛུགས་ཀྱི་ལས་བྱེད། ཡང་ན་འོས་འཕེན་པའི་མཚན་ཉིད་མི་ལྡན་པའམ། ཁྲིམས་ཞིབ་ཁང་ནས་ར་འཕྲོད་འཕེར་ངེས་ཀྱི་ཀླན་ཀ་ཡོད་རིགས་ལ་བསྐོ་གཞག་ནམ་ཡང་མི་ཆོག གལ་སྲིད་ས་གནས་འོས་བསྡུ་ལས་ཁང་གི་ཚོགས་མི་གང་ཞིག་དབུས་འོས་བསྡུ་ལས་ཁང་ནས་དངོས་གཞིའི་འོས་གཞི་གསལ་བསྒྲགས་ཟིན་ཁོངས་ཡོད་ཚེ། གསལ་བསྒྲགས་ཡིག་ཆ་ས་གནས་འོས་བསྡུ་ལས་ཁང་ལ་འབྱོར་ཚེས་ནས་བཟུང་བདུན་ཕྲག་གཅིག་གི་ནང་ཚུན་དོ་བདག་གིས་ས་གནས་འོས་བསྡུ་ལས་ཁང་གི་ཚོགས་མི་ནས་རང་བཞིན་ཕྱིར་འཐེན་བྱེད་དགོས་ཤིང༌། ཚབ་གསར་སྐབས་འཕྲལ་སོ་སོར་དོན་ཚན་ ༡༢ དང་ ༡༣ ནང་གསལ་ལྟར་བསྐོ་གཞག་དགོས། གལ་སྲིད་དོ་བདག་ནས་སྒྲིག་དོན་ཉམས་ལེན་མ་ཞུས་ཚེ་ཉེས་ཆད་དུ་ས་གནས་དེ་ནས་འོས་བསྡུ་དངོས་གཞིའི་སྐབས་འོས་གཞི་དེར་འོས་གྲངས་ཇི་ཡོད་དབུས་འོས་བསྡུ་ལས་ཁང་ནས་རྩིས་མེད་གཏོང་རྒྱུ།

ས་གནས་འོས་བསྡུ་ལས་ཁང་གི་ཚོགས་མི་དང་ཟུར་དཔང་གི་ཡུན་ཚད།

ས་གནས་འོས་བསྡུའི་འགན་འཛིན་ཕུད་ས་གནས་འོས་བསྡུ་ལས་ཁང་གི་ཚོགས་མི་དང༌། ཟུར་དཔང་མི་འོས་པའི་གནས་ཚུལ་རིགས་བྱུང་ན་ལས། དེ་མིན་ཚོགས་མི་དང་ཟུར་དཔང་བཅས་ཀྱི་ལས་ཡུན་འགོ་འཛུགས་ཕྱི་ཟླ་ ཚེས་ ནས་ཡུན་ཚད་ལོ་ རེ་ཡིན།

keyboard_arrow_up